Wintafreid

  Wintafreid

 

Hargodfix nu amoi, es håt so vü gschniebm!

Und da gånz` Schnee is a no bliebm!

Saukåit is draußd, es zaht mi net!

Dös Weda, dös is sowås vo bled!

 

Es hüft nix, es muaß trotzdem gschegn.

Da Dokta håt eh gsågt, i soi mi bewegn.

In Godsnåm, dånn suach i an Schåi und a Haubm.

Jå, wo is denn de Jackn, jå kånnst da`s nå glaubm?

 

I moan ös war gscheida, i bleib nu herint.

Am End kimmt de Sunn und da Schnee, dea zarinnt.

Åba na, ma woaß do net gwiss,

ob dös vo mia nua a Wunschdenka is.

 

Es hüft nix! I muas aussi – aussi zun Schnee.

Auf d`Nåcht tuat ma sicha dös Gschtö wieda weh.

Dånn geh i hålt endli und påck ma den Scheara!

Cefix, dea is schwa und wiad åiwei schweara !

 

Sche långsåm, då gspiar i: Glei schiaßt`s ma ei!

Mei Åite, de tat dös richtig sche gfrei.

Nix war`s mit Stöckön auf da nein Båhn!

Nix war`s mit`n Trüfön mit meine Gspånn!

 

Ah, - de Sunn, de kimmt aussa, wia i glei moan.

Ah, - då hån i iatzt wirkli nix mea zun Toan.

I nimm den guatn Stock und a nu mein Stecka.

„Pfiat God, mai liabs Weibö! I geh dånn zan Hecka!“

 

Und bin scho glei drunt, bon Nåchban sein Teich.

Då geht`s ma so guat! I fühl mi wia neich.

Jetzt nu a kloans Bieral, odar åba a zwoa,

dånn nu a Schnapsal, sche schoaf und sche kloa.

 

Åns Hoamgeh net denga, - dös is ma iatzt wuascht.

Prost mitanånda! So vü Årwat måcht Duascht!

 

Jänner 2019 - Salzkammergut